Job 37

1 ^a“Kwa hili moyo wangu unatetemeka,
nao unaruka kutoka mahali pake.

2 ^bSikiliza! Sikiliza ngurumo ya sauti yake,
sauti ya ngurumo itokayo kinywani mwake.

3 ^cHuuachilia umeme wake wa radi chini ya mbingu yote
na kuupeleka hata miisho ya dunia.

4 ^dBaada ya hayo huja sauti ya ngurumo yake;
Mungu hunguruma kwa sauti yake ya fahari.
Wakati sauti yake ingurumapo tena,
huuachilia umeme wake wa radi.

5 ^eSauti ya Mungu hunguruma kwa namna za ajabu;
yeye hutenda mambo makuu kupita ufahamu wetu.

6 ^fHuiambia theluji, ‘Anguka juu ya dunia,’
nayo manyunyu ya mvua, ‘Uwe mvua ya nguvu.’

7 ^gIli wanadamu wote aliowaumba wapate kujua kazi zake,
yeye humzuilia kila mtu shughuli zake.

8 ^hWanyama hujificha;
hubakia kwenye mapango yao.

9 ⁱDhoruba hutoka katika chumba chake,
baridi hutoka katika upepo uendao kasi.

10 ^jPumzi ya Mungu hutoa barafu,
eneo kubwa la maji huganda.

11 ^kHuyasheheneza mawingu kwa maji,
naye husambaza umeme wake wa radi kupitia hayo.

12 ^lNayo mawingu huzungukazunguka pande zote kwa amri yake,
juu ya uso wa dunia yote,
kufanya lolote ayaamuruyo.

13 ^mHuleta mawingu ili kuadhibu wanadamu,
au kuinyeshea dunia yake na kuonyesha upendo wake.

14 ⁿ“Ayubu, sikiliza hili;
nyamaza na uyafikiri maajabu ya Mungu.

15 ^oJe, unajua jinsi Mungu anavyoyaongoza mawingu,
na kufanya umeme wake wa radi utoe mwanga?

16 ^pJe, wajua jinsi mawingu yanavyokaa yakiwa yametulia,
hayo maajabu yake yeye aliye mkamilifu katika maarifa?

17 ^qWewe unayeshindwa na joto katika nguo zako
wakati nchi imenyamazishwa kimya bila upepo wa kusini,

18 ^rje, waweza kuungana naye katika kuzitandaza anga,
zilizo ngumu kama kioo cha shaba ya kuyeyushwa?

19 ^s“Tuambieni yatupasayo kumwambia;
hatuwezi kutayarisha shauri letu kwa sababu ya ujinga wetu.

20 Je, aambiwe kwamba nataka kuongea?
Je, yuko mtu ambaye angeomba kumezwa?

21 ^tBasi hakuna awezaye kulitazama jua,
jinsi linavyong’aa angani,
upepo ukishafagia mawingu.

22 ^uKutoka kaskazini yeye huja na fahari kuu;
Mungu huja katika utukufu wa kutisha.

23 ^vYeye Mwenyezi hatuwezi kumfikia, naye ametukuzwa katika uweza;
katika hukumu zake na haki yake kuu, hataonea.

24 ^wKwa hiyo, wanadamu mheshimuni,
kwa kuwa yeye hamstahi yeyote anayejidhania kuwa ana hekima.”